Savaaqqap ilutai saattunngorlugit aggorneqassapput kaattarneqarlutillu, mannimmut mumeriarlugit raspinut muminneqassapput, taratsunik nakkalaariarlugit siatsivimmut mumittarlugit sianneqassapput.
Imaluunniit kissarsuummut 180°-mik kissassusilimmut aqilinissaata tungaanut uunneqassallutik.

Ammassaat saaniiarneqassapput puugutamullu ilineqarlutik, taratsunik nakkalaarneqassapput atornissaatalu tungaanut nillataartitsivimmiitinneqassallutik.
Mianersuullugit errortorneqassapput allarterneqarlutillu.

Ruuat aserortikkat appelsinap isseranik akuneqassapput.

Sassaalliilernermi ruuat saavaaqqanik schnitzel-inut iliorarneqassapput.
Ammassaat taratsikkat qaavanut ilineqassapput, kapersinik pinnersarneqasapput aamma tomaatinik pinnersarneqarsinnaapput.

Punneq aatsinneqassaaq seernallu kitsikkat akuliunneqassallutik.

Naatsiiat taratsierlugit qalannissaanut piifissaq qiteqqullugu uunneqassapput, imermut nillertumut errortorneriarlugit nillorserneqassapput.
Kitseriarlugit siatsivimmi kajortilaarlugit sianneqassapput, tarajorsuarnik nakkalaarneqassapput.
Eertat imermi taratsilaakkami kissanneqassapput.