Silap pissusia, pinngortitarpullu kusanangaaqisoq eqqugaaqqapput, taamaattumillu pitsaanngitsumik taamatut ineriartornerup iliuuseqarfiginissaa piffissanngorluni. Avatangiisilli eqqarsaatiginerussagaanni sumi aallartittoqassava? Annikitsunnguani aallartiinnarit, igaffimmilu aallartissinnaavutit. Igaffimmimi annikitsualunnik iliuuseqarnikkut allanngueqataasinnaavutit.
Avatangiisit eqqarsaatiginerullugit nerisaqarnerulernikkut aningaasatigut aamma sipaaruteqarfiusinnaavoq – akikinnerukkajuttarpormi. Imaappoq, pinngortitamut aningaasaqarninnullu iluaqutaasinnaavoq.
Igaffimmi avatangiisit eqqarsaatiginerunissaannut siunnersuutit ajornanngitsut aajuku pingasut.
Siunnersuut #1 – Taartunik neqitalinnik nerisarnitit annikillisikkit
Taartunik neqitalinnik nioqqutissiorneq CO2-mik annertuumik aniatitsissutaasarpoq, silaannarmullu ajoqutaanerpaat ilaanniilluni. Sapaatip akunnerata ingerlanerani ullormik taartunik neqitorfiunngitsumik aalajangiigit, taartunillu neqitorasi aalisagartoritsi kukkukuuarartorlusiluunniit, neqillu aserortikkat atornagit bønnenik chili sin carneliorlutit. Nerisassiorninni pupiit immussuarlu, neqit mamassusiinik mamassuseqarmata, atornerulikkit.
Siunnersuut #2 – Nerisanik eqqaanerit annikillisiguk
Igaat sinneqarpata iginnagit. Tiggaliat naatsiianik uutanik qallersuusikkit mayonnaisilerlugillu, qaqorteqqasut sinnit mannilerlugit aalateriarlugit klatkagiliorit, neqillu sinneri sandwichimut akugalugit. Eqqakkat issunngorsinnaasut, issunngorteriarlugit naasunut naggorissaatigikkit.
Siunnersuut #3 – Qaqorteqqasutornak naatsiiartorlutillu pastatortarit
Qaqorteqqasunut sanilliullugit naatsiiat pastallu CO2-mik aniatitsinnginnerusarput. Aatsaallu iluamik ilerasuuteqartussaajunnaarlutit Kujataanit naatsiiat mamarluinnaqqissaartut toqqarsinnaavatit. Taamaappammi ataatsimut isigalugu nunatsinneersunik, ukiullu qanoq ilinera malillugu atuissaatit, avatangiisinullu mingutsitsinnginnerullutit!
